Yashwant Sinha'n BJP a chhuahsan

Union minister hlui leh BJP hruaitu hlun, Yashwan Sinha chuan BJP a chhuahsan thu kar kalta Inrinni khan a sawi.

Yaswant Sinha chuan BJP a chhuahsan thu hi Patna-ah puangin, Prime Minister Narendra Modi-a kaihhruai party chuan democracy kalphung a ngai pawimawh tawk lo a, India ram democracy pawh dinhmun derthawngah a dah a ni tiin BJP nena an inzawmna zawng zawng a chhu chat tih a sawi a ni.

Sinha hi PM hlui Atal Bihari Vajpayee hunlaia BJP kaihhruai sorkarah khan union minister niin, Finance leh External Affairs minister a lo ni tawh a ni. Kum 80 ni tawhin politics lamah a active lutuk tawh lo a, mahse PM Modi-a kaihhruai sorkar kalphung chu a sawisel fo a, tunhnaiah pawh PM hi open letter a lo thawn tawh a ni. Nikum khan BJP kaihhruai sorkar hnuaia ram sum dinhmun a ṭhat loh thu te pawh a lo sawi tawh bawk.

BJP nena an inzawmna zawng zawng a tihtawp thu a sawi rualin, Sinha chuan political party dang zawm a tum lo tih a sawi a, democracy humhim turin a thawhpuite nen theihtawp an chhuah zui zel dawn tih a sawi.