Kristian missionary-te tana thawkah Rahul leh Sonia Gandhi puh

Bharatiya Janata Party (BJP) MP Bharat Singh chuan Congress president Rahul Gandhi leh a nu Sonia Gandhi-te chu Kristian missionary-te tana thawkah a puh.

BJP MP Bharat Singh hian special CBI judget BH Loya thihna thubuai chungchang a sawinaah he thu hi sawichhuaki, Gandhi-te nufa chu he thubuaiah hian Kristian missionary-te hrilh dan leh duh dan anga thil tiah a puh a, Rahul Gandhi chu a thusawi dan avanga thupha chawi turin a phut bawk.

MP Singh chuan Kristian missionary-te vangin India chu dinhmun hlauhawm takah a ding a, Rahul leh Sonia chuan Kristian-te hi an lo pui bawk a ni, a ti. Missionary-te chuan school ṭha leh hautak tak tak India ramah dinin, an sum hmuhte chu ram pawn lamah an thawnchhuak leh zel niin a sawi. Hemi rual hian democracy a nih vangin heng missionary te chungah hian eng action mah lak a ni dawn lo a, an school dinte pawh kharsak ni lo mah se, RSS enkawl Saraswati Shishu Mandir-te chu tihchangtlun chhoh zel tum a ni, a ti.

Loya hi kum 2014, December 1 khan Nagur-ah a thawhpui fanu pasal neihnaa a kal chu heart attack vangin a thi a ni. A thih lai hian police-ten dawt hmanga Sohrabuddin Sheik an beih chunchang a chhui lai a ni a, he inbeihna lemah inhnamhnawiha puh zingah hian police officer eng emaw zat leh BJP presiden Amit Shah hmingte pawh sawilan a ni. Thubuai pawimawh tak ngaihtuah a nih laia a thih thut avang hian thil dik lo a awm nia ngaiin, Maharashtra-a journalist BS Lone leh activist Tehseen Poonavala-te chuan chhui chian an lo phut tawh a ni. Congress president Rahul Gandhi pawhin President Ram Nath Kovind hmuin, judge Loya thih dan hi chhui chiang tir turin a lo ngen tawh bawk. Mahse Supreme Court chuan Loya thih danah hian thil dik lo a awm lo nia sawiin chhui chiang tura ngenna hi a hnawl a ni.