CJI ban phutna Vice President in a hnawl

Eptu party hrang hrangten Chief Justice of India Dipak Mishra ban phutna an thehluh chu Vice President leh Rajya Sabha Chairman M Venkaiah Naidu chuan nimin khan a hnawlsak.

Vice President Naidu chuan eptu party-ten CJI ban an phut chhan an tarlante chu a rin tlak tawk lo nia sawiin a hnawlsak a ni.

Eptuten CJI ban an phut chungchangah hian Pathianni khan Consittutional

expert hrang hrangte a kawm kual a, a tawpah eptute motion nawr chu ngaihtuah zui tlak loa ngaiin hnawl a ni ta a ni. Naidu chuan eptu hruaituten CJI ban an phut chungchang vantlang hriata an puangzar vak chu ṭha lo a tih thu a sawi a, an motion thehluh hi pawm a nih hma chuan puanzar a ni tur a ni lo, a ti.

Kar kalta Zirtawpni khan Congress kaihhruaiin eptu party hrang hrangte chuan Chief Justice of India Dipak Mishra ban phutin, parliament member 70 chuangin an hming an ziahna petition chu Vice President M Venkaiah Naidu hnenah hian an thehlut a ni. Eptute CJI ban tura an phutna chhan, a chet dan dik lo panga an tarlang bawk.

Heng zingah hian thubuai pawimawh leh ngaihven ngai zual bik ngaihtuah tura jugde a thlan bikte a pek ṭhin chungchangte pawh a tel. CJI in thubuai a semkual dana an lugnawi loh thu hi kumin January thlaa Supreme Court senior judge pali-ten press conference an neih khan an lo sawilang tawh a ni.