IIT alumni ten political party thar din

Ramchhung hmun hrang hranga Indian Institutes of Technology (IITs) alumni 50-te chuan an hna bansanin political party thar an din. An party thar hming atan hian Bahujan Azad Party an vuah a, Scheduled Castes, Scheduled Tribes leh Other Backward class-te dikna chanvo humhalh sak tumin an bei dawn a ni.

Bahuzan Azad Party hian Election Commission hnenah an party hming hi thehlutin, commission pawmpuina an nghak mek a ni.

2015 IIT Delhi graduate leh an pawl hruaitu, Naven Kumar chuan party thar din tur hian IIT hrang hrang ami 50-te chuan an hna an bansan tih a sawi a, hemi rual hian hmanhmawh taka chet lak nghal an tum loh thu leh, kum 2019 Lok Sabha inthlanpui pawh chuh an la tum loh thu a sawi.

Kumar chuan hmathlir thui tak an nei tih sawiin, hmanhmawh taka thil tih vut vut an tum lo a, kum 2020 Bihar Assembly inthlan neih tur chu an thlir lawk tih sawiin, hemi hnuah hian Lok Sabha inthlan pawh an la hmachhawn leh chauh tur thu a sawi a ni. He pawla member tam zawk hi SC, ST leh OBC mite an ni a, hnam hnufual zawkte chuan zirna leh sorkar hnaa an chanpual tur an chang tawk lo nia an ngaih thu an sawi.

Election Commission-in a pawmpui hunah party unit hrang hrangte dinin, hma an la ṭan dawn tih Kumar chuan a sawi bawk.