PM Modi-an China a tlawh dawn

Prime Minister Narendra Modi chuan April 27-28 hian China a tlawh dawn a, China President Xi Jinping nen inkawmain ram pahnihte inlaichinna ṭha zawk siam dan turte an sawidun ang.

PM Modi hi China President Xi sawmnaa zin tur a ni a, Wuhan city-ah hruaitu pahnihte hian meeting an nei dawn a ni. He hunah hian khawvel huap pawha ram pahnihten thawhdunna ṭha an neih theihna tur te, an inkar boruak ṭha zawk siam a nih theih dan turte an sawidun dawn niin China Foreign Minister Wang Yi chuan a sawi.

Pathianni khan External Affairs Minister Sushma Swaraj-i leh China Foreign Minister Wang Yi-te chu Beijing-ah an lo inkawm tawh bawk a ni.