Prime Minister thusawi danah AIIMS doctor-te an lungawi lo

AIIMS' Resident Doctors' Association (RDA) doctor-te chuan Prime Minister Narendra Modi-an kar kaltaa London a tlawh ṭuma doctor-te thil tih dan dik tawk lo a sawi chu an dem thu an sawi a, doctor-te chuan pharmaceutical firm vawrhlar tumin conference-te pawh an tel ṭhin tih an sawi.

PM Modi hian London-a Westminster-a 'Bharat Ki Baat Sabke Saath' hun buatsaiha thu a sawiah, pharma company-te huaihawta international conference hrang hrang neih a nih ṭhin thu leh, heng conference-a doctor-te an tel ṭhin thu a sawi. Doctor leh pharmaceutical company-ten inzawmna an neih avangin damdawi pawh manto tak taka hralh a ni a, hemi titawp tur hian sorkar laipui chuan mantlawm zawka damdawi hralh chhuahna tur generic store-te a siam thu a sawi a ni.

Modi chuan, "Doctor-te chuan conference-a tel turin Singapore, Dubai te an tlawh fo a, hei hi damlo enkawl ngai an awm vang a ni lo. Pharma company-ten an sawm vang zawk a ni. Hetianga an inkara inzawmna awm tlat avanga damdawi man to tak taka zawrh a ni ṭhin hi sorkar chuan dan a tum a, hemi damdawi quality in ang tho man tlawm zawka hralhna tur generic store a hawng ta a ni", a ti.

RDA chu PM thusawi danah hian an lawm lo hle a, damdawi man to taka hralhchhuah a nih theih nan an puih avanga ram pawn lamahte zinchhuah thei anga puhna chu thil zahthlak tak a nih thu an sawi. India chuan medical tourism lamah ramdangte zah pawh a hlawh chho hle a, pharmaceutical product thawnchhuahah pawh khawvelah pakhatna a ni mek a, hetihlaia PM-in a ni lo zawnga thu a sawi chuan doctor leh pharmaceutical industry-te hmalakna pawh a tichhe thei dawn niin an sawi.

Doctor-te chuan eng hnaah pawh lo ti dik lo tawk chu an awm ṭhin ngei tih an pawm thu an sawi a, hemiruala Modi-an a pumpui anga international platfom-ah doctor-te fiamthu thawhna ang hrima a hmang chu an lawm loh thu an sawi a ni. Hei hi ram khat PM-in international platform-a a khua leh tui, rim taka hna thawkte a sawichhiat a ṭum khat thlenna niin an sawi bawk. Doctor-te hna hautak leh thawh rim zia hre turin Modi chu sorkar hospital-ah ni khat chhung chu doctor ang a awm chhin turin an ti bawk.

Indian Medical Association (IMA) leh Association of Medical Consultants (AMC), Mumbai te pawhin Pathianni khan PM Modi hnenah hian doctor-te chungchang a sawi danah an lungawi loh thu hi ziakin an lo thlen tawh bawk a ni.