March 11 hnuah a ṭum khatnan hri kai thar 20,000 aiin tlem ta

India ramah Thawhṭanni khan Covid-19 kai thar 18,795 an awm belh leh a, March 11 hnua ni khata hri kai thar 20,000 aia tlem an awm ṭum khatna a ni. Pathiannia hri kai thar (26,041) nena khaihkhinin hri kai thar hi a tlahniam hle

Hemi ni hian Covid-19 vanga thi 179 awmin, Pathiannia thihpui 276 aṭangin an tlahniam bawk a ni.

Nitina hri kai thar, daily positivity rate chu 1.42% a ni a, ni 29 chhung 3% hnuailamah a awm tawh a ni. Covid-19 kai dam tawh, recovery rate chu 97.81% a ni bawk.

Union health ministry chuan ram chhungah ni khata hri kai hmuh thar chu ni 19 chhung 50,000 hnuai lam zel a ni tawh tih a sawi.

State hrang hrang zinga Covid kai tamna ber ni mek Kerala-ah pawh hri kai thar zat hi an tlahniam ve zel a, Thawhṭanni khan hri kai thar hi 11,699 awmin thihpui 58 an awm.

Chhimlam state zingah Tamil Nadu chu hri kai tam ber dawttu niin, hri kai thar 1,657 an awm a, thihpui 19 an awm bawk.

India rama mipui tamna ber state, Uttar Pradesh-ah Thawhṭanni khan Covid kai thar paruk chiah an awm. Hri leng hluar nasatna ni ṭhin, Delhi khawpuiah pawh hri kai thar 32 an awm. Heng state/UT pahnihah hian Covid vanga thi an awm lo ve ve a ni.

State lian pali - Rajasthan, Gujarat, Madhya Pradesh, Bihar-ahte hri vanga thi an awm lo a, Chhattisgarh, Jharkhand, Uttarakhand-te pawhin hri vanga thi an nei lo a ni.

Hmarchhak state zingah Mizoram chu nikhata hri kai hmuhchhuah tam berna ni lehin, Assam chuan a dawt. Assam-ah hian hri kai thar 412 leh hri vanga thi pariat an awm.

Covid-19 vaccine dose vaibelchhe 86 chuang semchhuah ni tawhin, Thawhṭanni khan dose vaibelchhe khat chuang semchhuah leh a nih thu Union health ministry chuan a tarlang.

World Health Organisation (WHO) chuan India rama Covid vaccine siamchhuah Covaxin tana emergency use authorisation (EUA) dilna chu la pawmsak loin, a la tikhawtlai rih a, vaccine siamchhuaktu Bharat Biotech hnenah a hriat duh dangte a la zawhbelh leh a ni. Hetianga WHO-in a tihkhawtlai hi India mi tam tak, a bikin ram danga zirlaite a nghawng buai phah rin a ni. EUA phalna a neih tel loh chuan ram tam zawkin Covaxin hi an pawm thei dawn lo a ni.