Sipaite'n J&K-ah Pakistan firfiak pakhat kaphlum

Indian Army chuan nimin khan Jammu and Kashmir-a Uri sector-ah Pakistan firfiak pakhat an kaphlum a, pakhat dang a man.

19 Infrantry Division GOC, major generel Virendra Vats chuan Uri sector-a Line of Control (LoC)-ah sipaite hian ni kua chhung chu beihpui an thlak tawh tih sawiin, patrol team chuan ramri kaltlanga India-a rawn luhruk tum firfiak pahnihte hi hmuin an inkap zui ta niin a sawi. Firfiak pakhat chu kaphlumin pakhat zawk an man a, hetih lai hian Pakistan lamah mi dang pali an awm tih a sawi bawk.

September 18 aṭanga Uri sector-a beihpui an thlaknaah sipaite hian AK series rifle pasarih, pistol leh revolver pakhat, grenade 80 chuang leh India leh Pakistan pawisa eng emaw zat an man tawh tih Vats chuan a sawi. Firfiak an man hi Ali Babar Patra niin Pakistan firfiak pawl, LeT mi a nih thu a sawi.