PM Modi-an Rashtriya Gram Swaraj Abhiyan a tlangzarh

Prime Minister Narendra Modi chuan Panchayati Raj system thuam chakna tura scheme siam, Rashtriya Gram Swaraj Abhiyan chu nimin khan Madhya Pradesh-ah tribal district-a Ramangar-ah a tlangzarh.

Sorkar laipui chuan he scheme hi rural body rintlak zawk, sum lama ngelghet zawk leh ṭangkai zawka siam an nih theihna turin a duang a ni. He programme hmang hian Panchayats system hlawhtlinna dal thei thil awmte siamṭha a, an theihna tihchak leh thuneihna leh mawhphurhna ṭha zawk siam a ni dawn a ni.

Narendera Modi chuan kum nga chhung atana Madhya Pradesh tribal area-a hmasawnna tur hmathlir siamte a tlangzarh nghal bawk. He ruahmanna siam hnuaiah hian tribal panchayat hnuaia hmasawnna kalpuina turin cheng vaibelchhe nuai hnih ruahman a ni. PM chuan sorkar laipui chuan thingtlang tihhmasawnna turin theihtawp a chhuah zel dawn tih a sawi.

Modi hian Maneri-ah Liquefied Petroleum Gas (LPG) bottling plant dinna tur lungphum a phum nghal bawk. LPG plant siamna tur hian cheng vaibelchhe 120 pek a ni dawn tih a sawi a, he plant hmang hian Maneri leh a chhehvel bialte chuan gas cylinder hnianghnarin an la thei dawn a, mi tam tak tan hna thawh tur a siamsak dawn bawk a ni, a ti.

PM chuan tualchhung mite chu an fate zirna ngaipawimawh turin a ngen a, hei hi naupang hmalam hun atana thil pawimawh a ni a, sorkar laipui pawhin zirna chu a dah pawimawh ber a ni, tiin a sawi.