Congress president chungchang mawi lo taka sawitu BJP hruaitu man phut

Congress party chuan Facebook-a an party president, Rahul Gandhi-a thlalak leh a chungchang mawi lo taka sawina post-tu BJP hruaitu leh Chhattisgarh MLA hlui Bhima Mandavi chu man turin an phut.

Bhima Madavi chuan he thil post avang hian ngaihdam a dil a, ama tih ni loin a social media assistant-te tih niin a sawi. A thlalak post hi Thawhṭanni khan social media lamah a darh nasa hman hle a, mahse a hnuah a

Facebook Page aṭang hian a delete leh nghal a ni. Madavi Facebook Page-ah hian Rahul Gandhi thlalak naupangin a zunkhum lai dah a ni a, Congress president chuan Hindu-te ṭhendarhin, an chhungkua chuan India an rawk a ni tiin an inziak tel bawk.

Mandavi chuan hetiang thil hi tih loh tawp tur a ni tih a sawi a, ama post ni loin a social media account enkawltute post ni mah se pawi a tiin thupha pawh a chawi nghal tih a sawi. A account enkawltu chu mi pahnih pathum an nih thu hrilhin, he thlalak post tu ber pawh a zawnchhuah tur thu a sawi bawk.

Chhattisgarh Congress thupuangtu Sushil Anand Shukla chuan hetianga mawi lo taka Rahul Gandhi thlalak leh a chungchang sawina post siam anih vang hian BJP chu thupha chawi tura an phut thu a sawi. A thil post aṭang hian BJP hruaitute rilru puthmang hniam zia pawh a langchiang hle a ni, a ti. Rahul Gandhi lar chho zel chuan BJP a timangang niin a sawi bawk.