Kathua tualthah thubuaia mante J&K HC-ah zualko

Jammu and Kashmir-a Kathua district-a hmeichhe naupang pawngsual rawn leh thah a nih chungchang thubuai chhuitu state crime branch-in an man policeman leh special police officer (SPO)-te chuan Jammu and Kashmir High Court-ah he thubuai hi CBI chhui ṭhat tir turin an phut. State crime branch thubuai chhui chu hnawl turin an phut bawk.

Sub-inspector Anand Dutta leh SPO Deepak Khajuria-te chu Kathua district-a hmeichhe naupang kum riat mi pawngsual leh thah a nih chungchangah pawikhawihtute manna tur finfiahna awmte tichhiaah puhin an man a ni. Mahse Thawhṭanni khan an ukil, Veenu Gupta chuan an puhna chungchang hi CBI chhui ṭhat tir tura phutin High Court-ah petition a thehlut a ni.

Petition thehluttute hian an chungchang chhuina hi local police-te kut aṭangin midang kutah pek a ni a, a hnuah Special Investigation Team (SIT) kutah pek leh a ni tiin, a bul aṭanga chhui ṭhat tir turin an ngen.

Kumin January 17 khan Kathua ramhnuaiah hmeichhe naupang kum riat mi chu kar khat chin hriat loha a bo hnuin a ruang hmuh a ni. He hmeichhe naupang hi pawngsual rawn a nih hnuah thah a ni. January 23 khan state sorkar chuan he thubuai hi crime branch chhui turin a pe a, anni hian SIT dinin pawikhawihnaa inhnamhnawiha puh mi pariat an man tawh a, an zingah hian sub-inspector leh SPO hi an tel a ni.