Pawngsual thubuaiah self-styled godman Asaram thiam loh chantir

Rajasthan-a Jodhpur court chuan nimin khan self-styled godman Asaram chu kum 2013-a amah zuitu zinga hmeichhe pakhat, kum tlinglo pawngsuala puhnaah thiam loh a chantir a, damchhung tang turin a hrem.

Asaram hi kum 2013, August thlaa Uttar Pradesh mi, hmeichhe tleirawl kum 16 mi pawngsuala puh niin, kum 2014 September thla khan man a ni a, Jodhpur Central Jail-ah tantir a ni. Asaram-a zuitu tam tak chuan an puhna hi thudik lo niin an sawi a, hei vang hian nimina a thubuai ngaihtuah pawh hi venhimna khauh tak hnuaiah Jodhpur Central Jail-a courtroom-ah neih a ni.

Jodhpur-a Asaram-an hmeichhe tleirawl pawngsual a nih chungchangah hian Asaram bakah midang pali thubuai siamsak an ni. Court chuan Asaram bakah midang pahnih chu thiam loh a chantir bawk a, kum 20 ve ve tang tura hrem an ni. Midang pahnih erawh chu thiam chantir an ni thung.

Asaram hi Surat-a pawngsualna theng pahihnah inhhnamhnawiha puh a ni bawk a, amah bakah a fapa Narayan Sai pawh puh tel a ni bawk. An pafa hian hmeichhe unau pahnih hreng beta pawngsuala puh an ni a, he thubuai hi Gujarat-ah ngaihtuah a ni.

Kum 77 mi Asaram hi huhang ngah tak niin, ramchhung hmun hrang hrangah ashram 400 vel a nei a, zuitu pawh mi nuai tel a nei a ni. Hei vang hian amah zuituten buaina an chawh chhuah venthawn thilah thuneitute chuan Asaram-a zuitu tamna state pathum, Rajasthan, Gujarat leh Haryana hotute hnenah venhimna khauh taka kalpui a, buaina chhuah hlauhawm zualna hmunahte punkhawm khapna thupek te siam turin an ti a ni.

Nimin zing dar 8 vel khan judge Madhusudan Sahrma chuan Jodhpur-a special court hi thlengin, chawhma dar 10.40-ah court thutlukna hi puan a ni. Damchhung tang tura hrem a nih bakah, Asaram hi cheng nuai khat chawi tura tih a ni bawk.