Kathua Gangrape : Jammu atangin thubuai sawn mai thei

Supreme Court chuan Jammu and Kashmir-a Kathua district-a hmeichhe naupang pawngsual rawn leh thah thubuai chu dik taka rel a tum ber a ni tiin, he thubuai hi Jammu aṭangin hmun dangah sawn a ni mai thei tih a sawi.

Court chuan, “Rorelna dik taka kalpui a ni dawn a, vanduaina tawktu leh pawikhawihtute chungchang pawh kan ngaihven reng a ni. Thubuai ngaihtuahnaah thil fel tawk lo tlemte pawh a awm a nih chuan, Kathua aṭangin he thubuai hi hmun dangah ngaihtuah tura sawn a ni ang”, a ti.

Chief Justice Dipak Misra leh justice AM Khanwilkar leh DY Chandrachud te awmna bench chuan, thubuai ngaihtuah mek chu a tuartu chhungte leh pawikhawihtua puhte chungah dik taka rel tur a ni, a ti. Heng mite leh an ukil-te himna pawh ngaihtuah a ni tih a sawi bawk.

Court chuan lawyer ṭhenkhatin court rorel dan an tibuai nia sawi chung-chang pawh a ngaihtuah thu sawiin, “Lawyer-te chuan an ti dik lo anih chuan anni pawh dan ang takin an chungthu ngaihtuah a ni ang” tiin a sawi.

Kathua-a pawngsual tawktu hmeichhe naupangpa chuan Court-ah hian an chhungkua bakah, an ṭhian leh ukil Deepika Singh Rajawat-te chuan vau an tawk niin a lo thlen tawh a ni. Jammu and Kashmir police-ten he thubuai an chhui danah a lungawi thu a sawi a, hemi rual hian thubuai hi Kathua court aṭanga Chandigarh-a sawn turin a ngen a ni. Hetih lai hian pawikhawihtua puhte chuan he thubuai CBI chhui tir a, Kathua district-ah ngei ngaihtuah an ngen thung.

Kathua-a pawngsualna thleng chungchang hi state police-a Crime Branch chuan chhuiin, mi pasarih lakah thubuai a ziak lut a, pawikhawihtua puh zinga pakhat chu kum tling lo a nih avangin juvenile court-ah thubuai pakhat thehlut a ni bawk.