MP leh MLA 58-ten hate speech thubuai nei

Association for Democratic Reforms (ADR) leh National Election Watch (NEW) in report a tihchhuahah, ramchhunga MP leh MLA 58-te chuan inhuatna chawktho thei zawnga thu sawia puhna, hate speech thubuai an nei mek niin a tarlang.

ADR leh NEW hian MP/MLA-ten inthlan hnuhnung bera an affidavit an thehluhte zirchiangin report hi a siam a ni. Hate speech thubuai nei zingah hian Lok Sabha MP ṭanglai 15 an awm a, heng zingah 10 chu BJP member niin, All India United Democratic Front (AIUDF), Telangana Rashtra Samithi (TRS), Pattali Makkal

Katchi (PMK), All India Majlis-e-Ittehadul Muslimeen (AIMIM) leh Shiv Sena (SHS) MP pakhat ṭheuh an awm bawk.

MLA ṭanglai zingah 43 chuan hate speech thubuai an nei a, heng zinga 17 chu BJP member niin, TRS leh AIMIM MLA panga ve ve, TDP 3, Congress, All India Trinamool Congress (AITC), Janata Dal United (JDU) leh Shiv Sena aṭangin pahnih ṭheuh, Dravida Munnetra Kazhagam (DMK), Bahujan Samaj Party (BSP), Samajwadi Party (SP) MLA pakhat ṭheuh bakah independent MLA pahnih an ni.

Hate speech thubuai nei MLA zinga 11 chu Telangana MLA an ni a, Bihar MLA pali, Uttar Pradesh 9, Maharashtra 4, Andhra Pradesh leh Karnataka-ah pathum ve ve, Gujarat, Madhya Pradesh, Tamil Nadu, Rajasthan and Jhakhand-ah pakhat ṭheuh an awm bawk.

Union minister Uma Bharti bakah sate minister 8-te chuan hate speech thubuai hi an nei a, Asaduddin Owaisi (AIMIM) leh Badruddin Ajmal (AIUDF) hruaitute pawh thubuai nei zingah hian an tel.