Ni hnih chhung hri kai thar 20,000 aiin tlem ; Ni 194 hnua hri kai mek tlem ber ṭum thleng

India ramah Thawhlehni khan Covid-19 kai thar 20,000 aia tlem awm lehin, ni hnih chhung hri kai thar 20,000 hnuailamah an awm. Ni 194 hnua hri kai mek, active case tlakhniam ber ṭum a ni bawk.

Ministry of Health and Family Welfare chuan hri kai 18,870 an awm tih sawiin, hemi ni vek hian coronavirus kai dama puan 28,178 leh thihpui 378 an awm. Hri kai hmuhchhuah tawh zat chu 3,37,16,451 niin, an zinga 3,29,86,180 chu dama puan an ni tawh a, hetihlai hian mi 4,47,751 te chuan an thihpui tawh thung.

Health Ministry tarlan danin, hri kai mek 2,82,520 an awm a, hri kai hmuhchhuah tawh aṭanga 1% ai pawhin an tlem zawk a, March 2020 hnua a tlem ber ṭum a ni bawk.

Thawhṭanni khan ram­chhungah Covid-19 kai thar 18,795 awmin, ni 201 hnua hri kai thar 20,000 hnuailama a awm ṭum khatna a ni.

India ramah Thawhlehni khan Covid-19 vaccine 54,13,332 semchhuah belh lehin, rampumah dose 87,66,63,490 semchhuah a ni tawh. Health Ministry chuan state leh UT tan vaccine dose la hmanchhuah loh vaibelchhe 4.57 a awm thu leh dose nuai 83.80 te chu semchhuah mai theiha a awm thu a sawi.

Covid vaccine semchhuah hi thla riat kalpui a nih hnuah puitling zingah 25% dawnin vaccine dose bikimin an la tawh. Vaccine dose khatna la hi puitling zingah 68% tling tawhin, dose hniha la hi 24.6% an tling tawh bawk.

State lian pali - Uttar Pradesh, Maharashtra, Madhya Pradesh leh Gujarat-ah chuan mi vaibelchhe ruk chuangten vaccine hi an la tawh a; West Bengal, Rajasthan, Karnataka leh Bihar-ah mi vaibelchhe nga chuangin an la tawh bawk a ni.