Delhi sorkarin January 1, 2022 thleng halmawi hal khap

Delhi Pollution Control Committee (DPCC) chuan Thawhlehni khan khawpui chhungah January 1, 2022 thleng halmawi/halpuah hal leh zawrh khapna thupek a tichhuak.

Chief Minister Arvind Kejriwal chuan September 15 khan halmawi khapna thupek hi an tihchhuah tur thu sawiin, "nunna chhanhim nan a ṭul a ni," a ti.

DPCC order tarlan danin, mithiam ṭhenkhatte chuan hunpui laia halmawi/halpuah hal nasat hian mipuite chu taksa inkar hlata awm tura dan siam bawhchhiatna thlenin hei hian hri a tidarh leh theih bakah halmawi hal vanga boruak bawlhhlawh chhuakin mihring hriselna nasa zawka a khawih chhiat theih thu an sawi. "Delhi NCT huamchhungah January 1, 2022 thleng halmawi hal leh zawrh khap tlat a ni" tiin DPCC order chuan a tarlang.

Pollution control body chuan district magistrate leh deputy commissioner of police te chu he thupek hi khauh taka kengkawh tur leh, an hmalak dan nitin report thehlut turin a hrilh bawk.

Delhi chuan an state ṭhenawm state-te chu National Capital Region-a public transport an tlantirte chu thlak a, electirc motor hmang tam turin a lo ngen tawh bawk. Boruak chhia tihziaawm theihna turin halmawi khap ve turin a ngen bawk a ni.

National Green Tribunal chuan nikum November 9 zanlai aṭanga November 30 zanlai thleng NCR-ah halmawi hal leh zawrhchhuah a lo khap tawh bawk.