Congress Party-ah Kanhaiya Kumar a lut

Jawaharlal Nehru University (JNU) zirlai pawl hruaitu hlui, Kanhaiya Kumar chuan Thawhlehni khan Congress party a zawm a, Delhi-a All India Congress Committee headquarters-ah lakluh a ni . He hun hi party hruaitu Rahul Gandhi pawhin a hmanpui.

Kanhaiya Kumar lakluh inkhawm buatsaihah hian Gujarat Dalit leader Jignesh Mevani pawhin Congress party a thlawp thu hi a sawi a, mahse thil dang avangin a la luh theih loh thu a sawi.

Congress a zawm hnua press mite a kawmnaah, Kumar chuan Congress a zawm chhan sawiin, "Party ringawt ni loin, idea a ni tel. Ram chhunga party upa ber leh democratic party a ni a, kei chauh ni lo mi dang tam tak pawhin Congress tel loin ram hi a dingchhhuak thei loin an ngai a ni," a ti. Congress party chu lawng lian tak ang a ni a, chhanhim a nih chuan mi tam tak beiseinate chhanhim tel niin, Mahatma Gandhi-a'n inpumkhatna a duhna te, Bhagat Singh-a huaisenna ang te, BR Ambedkar-an intluktlanna a duhnate chu vawnhim a ni dawn a, hei hi a zawm chhan tak pawh a nih thu a sawi.

JNU Students' Union president hlui, Kanhaiya Kumar hi kum 2016 khan university campus-ah Parliament beihnaa a ruahmantu bera puh, Afzal Guru thih chamah a hriatrengna hun an buatsaih avangin sorkar dodal zawnga cheah puhin, jail-ah pawh a lo tang tawh a ni.

Punjab Congress President a bang
Punjab Pradesh Congress Committee (PPCC) president Navjot Singh Sidhu chu Thawhlehni khan party hruaitu a nihna aṭangin a bang ve thung.

Party high command-in PPCC president atana an ruat aṭanga ni 72 hnuah Sidhu chuan banna hi a theluh leh nghal a ni. A banna chhan hi sawichiang lo mah se, chief minister Charanjit Channi-a'n a cabinet a thlakkual danah a lungawi lo nia sawi a ni. Cabinet ruat danah Sidhu hian CM hian a duh anga thil kalpui ngawt lo a, a biakrawn a phut a ni. Sidhu-a'n bannaa thehluh hnu hian an thlawpna lantirin state minister pakhat leh officer bearer dang pathum pawhin banna an thehlut ve nghal bawk.