Covid-19 kai enkawl dam 1,29,215 awm tawh

India ramah Covid-19 kai enkawl dam 1,29,215 an awm tling tawh a, enkawl dam rate hi 48.46% a nih thu Ministry of Health and Family Welfare chuan an tarlang. 

Nimina MoHFW report-a a lan dan chuan Covid-19 kai hmuh chhuah thar 9,987 an awm leh a, nimin piah lam aiin paliin an tam zawk a, a zawna ni sarihna turin kai hmuh chhuah tam ni ber a thleng leh bawk. 

Ram pumah hripui kai mi 2,66,598 an awm tawh a, enkawl dam nuai khat chuang an awm tawh chung hian hri kai mek 1,29,917 an la awm tho a ni.

Sorkar report tihchhuah hma darkar 24 chhungin hri kai enkawl dam 5,120 an awm a, thihpui 331 awm lehin mi 7,466-in an thihpui tawh bawk. Thihpui rate hi 2.80% a nih thu an tarlang.

Indian Council of Medical Research (ICMR) report aṭanga a lan dan chuan darkar 24 chhungin sample 1,41,682 an test a, heti hian hri len ṭantirh aṭang khan ram pumah sample 49,16,116 an endik tawh a ni.

ICMR hian teseting facility neih ṭhat kawngah hian an theih tawpin hma an la reng a, sorkar leh private laboratory eng emaw zat hri kai enfiahna turin a pawmpui reng a ni. Tunah hian laboratory pawmpui 748 a nei mek a, chung zinga 553 chu sorkar laboratory a nih laiin 231 chu private laboratory a ni thung.

India rama hri kai tamna ber state Maharashtra-ah chuan nimin khan hri kai hmuh chhuah thar 2,553 lai an la awm a, ni hmasa lam aiin tlemin tlahniam deuh mah se ziaawm lam a la pan thei chuang lo.

Hri kai tam lama China lehpeltu Maharashtra-ah hian mi 88,528-in hri an kai tawh a, enkawl dam tawh hi an la tlem zawk a, 40,975 enkawl dam tawhin hri kai mek 44,384 an awm. Sorkar report tihchhuah hma darkar 24 chhungin mi 1,661 an enkawl dam laiin thihpui 109 an awm leh a; Maha-ah ringawt hian mi 3,169-in an thihpui ta a ni.

Hri kai tam ber dawttu state Tamil Nadu-ah chuan mi 33,229-in hri an kai tawh a, hmuh chhuah thar 1,562 lai la awmin mi 17,527 an enkawl dam tawh thung a, thihpui 286 an awm bawk.

Delhi-ah pawh Thawhṭanni khan hri kai hmuh chhuah thar an la tam hle a, 2,289 awmin hri kai  hmuh tawh zawng hi 29,943 an awm tawh a ni. Enkawl dam 11,357 an awm laiin kai mek 17,712 an awm thung. Mi 113-in thihpui lehin Delhi-ah hian mi 874 Covid-19 vang hian an thi tawh a ni

Delhi deputy chief minister Manish Sisodia chuan khawpui chhunga hri kai pun chak dan aṭanga chhut chuan July thla tawpah Delhi-a Covid-19 kai awm zat hi nuai 5.5 an tling chho thei dawn niin a sawi. Hei vang hian hri kaite enkawlna tur damdawi-in khum tam zawk mamawhna a sang chho dawn a, hei hi sorkarin Delhi-a chengte enkawlna tura damdawiin khumte a hauhsakna chhan pawh a nih thu a sawi. Mahse damdawi hauhsak chungchanga sorkar thutlukna siam hi Lieutenant Governor Anil Bajijal chuan a hnawlsak a ni.