Rahul Gandhi chuanna thlawhtheihna chhui chian phut

Congress president Rahul Gandhi chuanna thlawhtheihna chu brouaka a awm laia a khawl lam fel lo a awm nia sawiin Congress party chuan chhui chian phutin police-ah complaint an thehlut.

Rahul Gandhi chuanna thlawhtheihna hi nimin zing dar 10.45 vel khan Karnataka hmarlama Hubali airport-a a ṭum dawnin a vei lamah nasa taka leiin, nasa taka insawiin lei lamah chak takin a bir thla niin an sawi. He thil thleng chungchang hi police hnenah an complaint bakah, Congress party chuan Directorate General of Civil Aviation (DGCA) hnenah pawh an thlen a, thlawhtheihna awm dan chu a rinhlelhawm nia sawiin chhui chiang turin a ngen a, DGCA pawhin a enfiah tur thu a sawi.

Rahul Gandhi-a thawhpui hnai tak, Kaushal Vidyarthi chuan state DGP Neelmani N Raju hnenah lehkha thawnin, thlawhtheihna ṭum dawn hian khua a ṭha a, thli pawh a tleh lo niin a sawi. Thlawhtheihna awm dan chu a rinhlehlawm thu sawiin, he thil hi khaw awmdan nghawng a ni lo a, a khawl lam thil nia an hriat thu a sawi. Rahul Gandhi-a chuanna a nih avangin a khawl lam lo khawih chingpen pawh thil awm thei a nih thu sawiin, chhui chiang tura an phut thu a sawi a ni. Vidyarthi chuan thlawhtheihna hian a ṭum thum beihnaah chhun dar 11.25 vel khan Hubali airport-ah hian a ṭum thei chauh niin a sawi bawk.

DGCA hotu BS Bhullar chuan autopilot mode-a harsatna awm vang niin a sawi a, hei hi thil thleng zen zen lo niin a sawi. Bhullar chuan autopilot mode ṭhat loh vang hian pilot chuan manual mode-ah dahin him takin a ṭumpui a ni, a ti. VIP flight reng reng chu DGCA chuan uluk takin a enfiah ṭhin a, Rahul Gandhi chuanna thlawhtheihna pawh hi an enfiah tur thu sawiin, kar hnih hnuah report kimchang a chhuah theih dawn thu a sawi.