PM Modi-an Mann ki Baat programme tum 43-na hmang

Prime Minister Narendra Modi chuan thla tina radio-a programme a hman ṭhin, Mann Ki Baat chu nimin khan a hmang leh. He programme hi ṭum 43 a hmanna a ni tawh a ni.

Nimina PM-in Mann ki Baat programme-a a thusawi tlangpuite chu - Commonweath Games 2018 neih takah India ram aiawha tel, ramchhung hmun hrang hrang aṭanga kalte chu a lawmpui thu a sawi. Harsatna leh chona hrang hrang paltlanga an thil tum an tihlawhtling thei chu a lawmpui thu a sawi a, hetiang dinhmun an thlen thleihna atana theihtawp chhuahpuitu an chhungte, enkawltute, coach, staff, zirtirtute leh ṭhiante pawh a lawmpui thu sawiin, duhsakna a hlan.

Yoga chu taksa 'fit' nan a pui reng a ni tih a sawi bawk. Yoga chu mitinten a thlawna an tih theih a ni tiin, Fit India movement-ah pawh chanvo pawimawh tak a chang a ni, a ti.

Ministry pathum thawkhoin 'Swachh Bharat Summer Internship 2018' an siam thu sawiin, college zirlai, NCC leh NSS te, Nehru Yuva Kendra zirlaite chu penchhuak a, khawtlang ṭhatna tura theihtawp chhuah turin a sawm.

Tui van vangin harsatna a la awm chho dawn nia sawi a ni fo a, hei vang hian tui humhalh kawngah mitin ten mawhphurhna la a, a theih ang anga humhalh dan ngaihtuah turin a ngen. Ruah tui khawl dante pawh ngaihtuah a ngaih thu a sawi bawk. Kum thum kalta chhung khan tui humhalhna turin kawng hrang hranga hma a lak a ni a, MNREGA budget aṭangin water conservation and water management atan chawhrualin kumtin cheng vaibelchhe 32,000 dah a ni, a ti.