Karnataka inthlan neih turah candidate 2,655 an awm

Karnataka Assembly inthlan neih tura chuh tum candidate 2,655 an awm a, heng zinga 219 chu hmeichhia an ni.

Assembly inthlan hi May 12 hian neih a ni dawn a, inthlana chuh tumte nomination paper thehlutte tan Inrinni kha inhnuhdawh theih hun tawp a ni.

Chief Electoral Officers (CEO) office chuan inhnuhdawh theih hun a zawh hnua candidate awm chu 2,655 a nih thu leh, nomination thehlut zinga 583 chu inhnukdawkin, nomination 271 chu hnawl a nih thu a sawi. Candidate-te hi BJP aṭangin 224, Congress 222, JD(S) 201 an awm. Anni bakah hian BSP aṭangin 18, CPI 2, CPIM 19, NCP 14 bakah registered unrecognise party aṭangin 800 leh independent 1,155 an awm bawk.

Assembly constituency 224 awmna, Karnataka Assembly hi inthlan thawh khatah zawh fel a ni ang. Assembly 224 zinga 173 chu general category tan dah a ni a, constituency 36 chu Scheduled Caste (SC) tan leh, seat 15 chu Scheduled Tribe (ST) tan dah a ni thung. May 15-ah vote tlate chhiarin result puan nghal a ni ang.

Kolar district-a Mulbagal constituency chu candidate tamna ber niin, he biah hian mi 39 in an chuh dawn a ni.

Karnataka-ah hian vote nei vaibelchhe 4.96 an awm a, an zinga vaibelchhe 2.52 chu mipa niin, hmeichhe voter vaibelchhe 2.44 an awm bawk. Vote nei thar, a ṭum khatna atana vote thlak tur nuai 15.42 an awm thar bawk. Vote thlakna tur polling station hi 56,696 siam a ni dawn a, inthlan hmasa aia a tamna hi 9% a tling. Vote thlakna atan hian Electronic Voting Machines (EVMs) bakah Voter Verifiable Paper Audit Trail (VVPATs) hman a ni dawn a, a ṭum khatna atan hmeichhia chauhin an enkawl plling station pakhat ṭheuh constituency tinah siam a ni ang.

Kum 2013 assembly inthlanah khan Congress party chuan seat 122 a la a, Chief Minsiter Siddaramaiah kaihhruai sorkar hi May 28, 2018 hian a term a tawp dawn a ni. BJP chuan seat 43 nei mekin, HD Deve Gowda kaihhruai Janata Dal (Secular) chuan seat 40 a nei bawk.