Rahul Gandhi-an 'Jan Akrosh' rally nei

Congress president Rahul Gandhi chuan nimin khan New Delhi-ah 'Jan Akrosh' rally a nei a, party president a nih hnuah Delhi-a rally a neihna hmasa ber a ni.

Ram Lila Maidan-a rally neihah hian party worker nuai hnih vel an tel. Rahul Gandhi chuan Prime Minister Narendra Modi leh a kaihhruai sorkar chu beiin, ram mipuite hnena dawt thu tam tak tiamah a puh.

Rahul Gandhi chuan Modi-a kaihhruai sorkar chu thuneihna a chan hmaa mipuite hnen a thutiamte hlen zo loah a puh a, "Sorkar laipui chuan kum li kaltaa inthlanpui neih dawna a thutiamte chu engmah a hlenchhuak lo a ni. Mipuite tana hna vaibelchhe hnih siam a tiam te, black money lakkir vek a tiamte kha eng tin nge a tih tak zel?" tiin a zawt.

BJP kaihhruai sorkar chu loneitute tibeidawngah a puh bawk. Gandhi chuan, "Arun Jaitley chuan loneitute loan ba ngaihdam chu BJP policy a nih loh thu a sawi a ni. Ramchhunga loneitute hi Congress tel lo chuan an ding khawchhuak thei lo a ni", tiin a sawi. RSS pawh bei zuiin, RSS tana rinawmte chu dinhmun pawimawh tak tak chelh turin dah an ni, a ti.

Nimina rally neihah hian party hruaitu dang, Sonia Gandhi leh PM hlui Manmohan Singh-te pawhin thu an sawi a ni. Sonia Gandhi chuan BJP sorkar hnuaiah section hrang hrangten harsatna an tawk a ni tiin, PM Modi chu loneitute leh ṭhalaite bumah a puh bawk.

Sonia Gandhi chuan, "Pawngsualtute hum an ni a, hna nei lo an pung nasa a, loneitu intihlum an tam a, hetichung hian BJP chuan eng mah a ti lo a ni" a ti a, hmeichhiate chunga hleilenna a hluarin, hmeichhe naupangte pawh an him lo a ni, a ti. BJP sorkar duh lohna lantira inlungrual turin mipuite a sawm nghal bawk.