Chhawmdawlna peknaah state-te thliarhrang lo turin ngen

Maharashtra deputy chief minister Ajit Pawar chuan leilung chhiatna thleng chungchangah BJP kaihhruai sorkar laipui chu state-te chhawmdawlna a pek danah thliarhranna nei lo turin a ngen.

Maharashtra sorkar hian kumin chhunga an state-in leilung chhiatna hrang hrang a tawhah, sorkar laipui chu chhawmdawlna Rs vbc 7,700 pe turin a dil a, mahse sorkar laipui chuan an dil zat aṭang hian Rs vbc 1,100 chauh a pe tih state minister of relief and rehabilitation Vijay Wadettiwar chuan a sawi. Chhawmdawlna pe tura a ngen zat hi an state-a cylcone tleh, ruahsur nasa leh leilung chhiatna thleng dangin thil a tichhiat hrang hrangte hlut zawng an chhut aṭanga an siam a nih thu a sawi.

Maharashtra Congress chief Nana Patole pawhin Narendra Modi kaihhruai sorkar chu chhawmdawlna a pek danah state duhsak zawng neiha a puh bawk a, chhiatna nasa tak an tawk chunga an mamawh ang ṭanpuina a pe duh lo chu a dem thu a sawi a ni.

Minister Wadettiwar thusawi chungchang a sawi zuinaah, Dy CM Pawar chuan chhiatna tuartu mipuite chhawm­dawlna peknaah sorkar laipui chuan tumah a thliar hrang tur a ni lo a ti.