Punjab CM hluiin Congress party chhuahsan tum

Punjab chief minister aṭanga bang, Congress hruaitu Captain Amarinder Singh chuan Congress party a chhuahsan dawn tih a sawi a, hemi rual hian BJP zawm a tum lo tih a sawi nghal bawk.

Punjab CM a nih lai aiin Amarinder Singh hi Punjab state Congress president nen an inkar boruak a ṭha lo hle a, September 18-a CM aṭanga a ban pawh kha nawr luih vang nia sawi a ni hial. A ban hnu hian Delhi-ah union minister Amit Shah nen pawh meeting an nei a, mahse meeting an neih hnuah BJP a zawm lo tih a sawi.

CM a nihna aṭanga a ban hma pawh khan central lama Congress hruaitu, a bikin Sonia Gandhi hnenah pawh a chunga party chet danah a lawm loh thu pawh a thlen niin a sawi. Congress party president-in CM aṭanga bang tura a ngen angin engmah sawi buai loin banna a thehluh mai thu a sawi. "Kum 50 chuang theihtawp ka chhuah hnuah pawh min rin ngam loh chuan, ka tan party-a awm zelna chhan tur a awm lo a ni," tiin "Tunah chuan Congress hi ka la chhuahsan lo a, mahse ka chhuahsan ngei dawn a ni," a ti.