India ramah Covid-19 kai thar 26,727 awm belh ; Ningani aiin hri kai 13% in sang zawk

India ramah Ningani khan Covid-19 hri kai thar 26,727 an awm belh leh a, Nilainia hri kai 23,529 nena khaikhinin 13% in a sang zawk a ni. Ramchhungah hri kaihhnawih vanga thi 277 awm lehin, thihpui tawh zawng zawng hi 4,48,339 an tling tawh.

Ram puma coronavirus kai hmuhchhuah tawh chu 3,37,66,707 an tling tawh. Hri kai tawh aṭanga hri kai mek, active case chu 0.82% a ni mek a, March 2020 hnua a hniam ber ṭum leh hri kai mek 2,75,224 chu ni 196 chhunga a tlem ṭum a ni bawk.

Covid-19 kai dam tawha puan, recovery rate chu 97.86% niin, March 2020 hnua a san ber ṭum a ni. Ningani khan dama puan mi 28,246 an awm leh a, ramchhunga hri kai dama puan chu 3,30,43,144 an tling tawh a ni.

Nitina hri kai thar zat , daily positivity rate chu 1.76% ni mekin, ni 32 chhung 3% hnuailamah a awm tawh a ni. Kartina hri kai thar zat, weekly positivity rate chu 1.70% a ni bawk.

India ramah Covid-19 vaccine dose vaibelchhe 89 chuang semchhuah a ni tawh a, puitling kum 18 chin zinga 69% te chuan dose khatna emaw tal an la tawh a, heng zinga 25% te chuan dose bikimin an la tawh tih sorkar laipui chuan a sawi.

Kerala state chu ramchhunga Covid-19 kai mek zinga 52% awmna a ni tih Ministry of Health and Family Welfare chuan a tarlang. Kerala-ah hian hri kai tlahniam zel mah se rampuma hri kai zat nena khaikhin chuan hri kai hi an la tam hle a ni.

Kerala-ah hian hri kai mek mi 1,44,000 (52%) an awm a, Maharashtra-ah 40,000 , Tamil Nadu-ah 17,000, Mizoram 16,800, Karnataka 12,000 leh Andhra Pradesh-ah active case 11,000 an awm mek tih Union Health Secretary Rajesh Bhushan chuan a sawi.

Delhi chuan Ningani khan Covid-19 vanga thi an nei lo a, hri kai thar 47 awmin, positivity rate chu 0.06% a ni a, hri kai mek 400 an awm.