J&K CM-in a cabinet siksawi

Jammu and Kashmir Chief Minister Mehbooba Mufti-i chuan nimin khan a cabinet a siksawi a, minister atan mi pariat ruat thar an ni.

Cabinet siksawi a nih dawn vang hian Pathianni zan khan Deputy Chief Minister Nirmal Singh chuan banna a lo thehlut tawh a ni. Deputy CM atan hian Assembly Speaker Kavinder Gupta chu ruat thar a ni a, Nirmal Singh chu speaker atan dah a ni.

Tunhnaiah J&K-a Kathua district-a hmeichhe naupang pawngsual rawn leh thah a nih avangin mipuiten lungawi lohna lantirin, rorellai People`s Democratic Party(PDP) leh Bharatiya Janata Party (BJP) ṭangrual sorkar pawhin beih a tawk nasa hle.

State sorkar hian chief minister tiamin minister 25 chin a nei thei a ni. Cabinet siksawi hnuah PDP chuan minister 14 neiin, BJP hian 11 a nei a ni. BJP MLA paruk chu minister atan hian ruat thar an ni a, PDP MLA pahnih dah thar an ni bawk.

Cabinet minister atana ruat thar zingah hian BJP state unit chief Sat Sharma bakah Rajiv Jasrotia leh Devinder Kumar Manual te an tel a, Minister of State for Transport Sunil Sharma chu cabinet minister-ah hlankai a ni bawk. Hetihlai hian BJP

Minister ṭanglai zinga pathum Nirmal Singh, Health Minsiter Bali Bhagat leh MoS Priya Sethi-te chu paih an ni thung. Hemi hma hian Kathua pawngsualna thlenga inhnamhnawiha puhte thlawpna kawngzawhnaa tel BJP minister pahnih chu an lo bang tawh bawk a ni. Governor NN Vohra chuan minister tharte hi Convention Centre-ah rinawmna thu tiamtirin a lalut dawn a ni.