Damdawi-in aṭanga chhuah tir a nih danah Lalu Prasad Yadav lawm lo

Ranchaw man tur tihchingpen chungchanga thiam loh chantira jail-a tang, Rashtriya Janata Dal (RJD) hotu Lalu Prasad chu New Delhi-a All India

Institute of Medical Sciences (AIIMS) aṭanga chhuah tir a nih danah a lungawi lo a, BJP chu damdawi-in aṭanga chhuahtir a nih theih nana inrawlhah a puh.

AIIMS thuneitute hnenah lehkha a thawnah, Bihar Chief Minister hlui Lalu chuan thla hmasa khan a lung, kal leh BP ṭha lo avangin AIIMS hian enkawl a ni tih sawiin, a dam ṭhat thlenga enkawl tura a ngen laiin a duh aia hmain damdawi-in aṭang hian chhuahtir a ni tih a sawi. A duhthusam anga enkawl a nih hmaa damdawi-in aṭanga chhuahtir a nih danah doctor-te chu eng anga nawr nge an ni tih a hriatthiam loh thu a sawi bawk. Hetihlaih hian AIIMS chuan Lalu Prasad hi a dinhmun a ṭha tawh a, zin tur pawhin a fit tawh niin a sawi a, hei vang hian Ranchi Medical College-ah enkawl zui tura refer a ni tih a sawi a ni.

BJP chuan Lalu-a puhna hi chhangin an party chuan inrawlhna an nei lo a, Lalu chuan doctor-te thutlukna pawm mai turin a ti. BJP thupuangtu Zafarul Islam chuan Lalu chu pawikhawihtu, thiam loh chang tawh a ni a, a awmna tur chu jail a ni tiin, a hriselna pawh a ṭha a ni, a ti. Lalu hi AIIMS aṭanga chhuahtir a nih tak avangin nimin tlai khan Ranchi-a Birsa Munda Central jail-ah hruai kir a ni ang.