By-poll-ah Mamata Banerjee hneh takin a tling

West Bengal chief minister leh Trinamool Congress hotu Mamata Banerjee chu Bhabanipur constituency-a by-election neihah hneh taka thlan tlin a ni a, a khingpui BJP candidate chu vote 58,832 in a hneh.

Kumina April-May-a state assembly inthlanah khan Banerjee hian Nandigram bialah BJP candidate Suvendu Adhikari a hneh zo lo a ni. Chief Minister nih chhunzawm zel tur chuan an sorkar aṭanga thla ruk chhung ngeia MLA-a thlan tlin a ngai a, hei vang hian a minister Sovandeb Chattopadhyay chuan Bhabanipur bial hi kianin a bang a , by-election neih a ni ta a ni.

By-election-ah hian BJP chuan CM khing tur hian bial chhung mi, lawyer Priyanka Tibrewal an dah a ni. Kum 41 mi, Tibrewal hi an state-a assembly inthlan zawh hnua tharum thawhna thleng chungchanga court-a petition thehluttu zingah pawh a tel.

CM Banerjee hian kum 2011 inthlana vote a hmuh aia tam zawk tun ṭum by-election-ah hian a hmu a, constituency chhung ward tinah a chak vek a ni.

TMC-in inthlan campaign-na atan Rs vbc 154.28 hmang
Kumin April-May thlaa state assembly inthlan neihah khan West Bengal-a hnehna changtu, Trinamool Congress (TMC) party chuan inthlan campaign-na atan cheng vaibelchhe 154.28 a seng.

Election Commission of India hnenah Election Expenditure Statement thehluhte chu poll panel hi public domain-ah a dah chhuah a ni. Party hrang hrangten inthlana an sen zat an thehluh chu hmuh theihin a awm tawh a, BJP sum sen zat erawh a la hmuh ve theih rih lo thung.

Tamil Nadu-a hnehna changtu, Dravida Munnetra Kazhagam (DMK) chuan an state bakah Puducherry union territory-ah campaign-na atan Rs vbc 114.14 an seng a ni. AIADMK chuan Tamil Nadu leh Puducherry-ah hian Rs vbc 57.33 a seng bawk.

Congress party chuan Assam, kerala, Puducherry, Tamil Nadu leh West Bengal-a inthlan campaign-na atan Rs vbc 85.93 a seng a, CPI chuan state pali leh UT pakhata campaign-na atan hian Rs vbc 13.19 sengin a seng tlem ber a ni.

Trinamool Congress, CPI leh Congress-te hi national party niin, DMK leh AIADMK erawh state party an ni thung. Party hrang hrangten inthlan senso tarlan zingah hian BJP sum sen zat hmuh tur a la awm ve lo.