Covid-19 nena kan indona a la tawp lo, phuba lak tumin a rawn let leh thei : AIIMS Task Force Chief

AIIMS Delhi-a COVID-19 Task Force chairperson Dr Navneet Wig chuan Covid-19 nena indona chu a la tawp lo a, hripui hi phuba lak tumin a rawn let leh thei tiin Inrinni liam ta khan a sawi.

Dr Navneet Wig chuan India ramin hlawhtling takin Covid-19 dose tluklehdingawn 90 chuang semchhuak tawh mah se mipuite chu hripui laka fimkhur zel turin a chah. "Mipui vaibelchhe 100 chuang leh mitin dose bikima kan pek vek a ṭul a ni. Hei hi kan tum chu a ni a, hmalam panin kan kal zel dawn a ni. Mahse hma kan lak chak a ṭul a, mitinin dose hnihna an lak vek a ngai a ni," a ti.

Vaccine sem chhuah ṭhat chu hripui laka indonnaa hnehna chan theihna tur a ni tih a sawi rualin, 'Indona awlsam tak a ni lo a, kan ngaih a ṭha nghal ngawt tur a ni lo. Fimkhur leh inralring renga kan awm reng a ngai a ni," tiin Dr Wig chuan a sawi.

Dr Wig chuan sawi chhun­zawmin, state ṭhenkhatte chuan positivity rate 10% chunglam an la nei tih a sawi a, "Thil harsa tak kan hmachhawn a ni. Ram tam tak chuan inbeihna an la kalpui mek bawk. Phuba la tura alo let leh theih avangin inralring taka kan awm reng a ngai a ni,"a ti.

Hunpui lo thleng tur karah Union Health Ministry chuan state leh UT-te chu Covid-19 darh tur veng tura hma la turin an lo hrilh fo tawh bawk a ni.

AIIMS COVID-19 Task Force chief chuan Diwali zawh kar hnih chhung chu fimkhur lehzual tur leh hmuntinah khawsik sang an tam ṭhin avangin mahni inveng ṭha turin a ngen. "Dengue, scrub typhus, typhoid fever leh airborne diseases kai kan hmu tam ṭhin a ni. Chuvang chuan doctor tan Covid nge flu, dengue, typhoid fever, emaw viral hepatitis an nih hriat a har dawn.

Hunpui chhung hian inveng ṭha a, mask vuah ṭha tur leh mipui punkhawmnaah tel tam lo turin ka ngen duh cheu a ni," a ti.