Karnataka-ah PM Modi a campaign

Prime Minister Narendra Modi chu May 12-a Assembly inthlan neihna tur, Karnataka state-ah nimin khan a campaign ṭan a, ni nga chhungin hmun hrang hrangah public meeting a nei ang.

PM hian chhim lam biala Chamarajanagar-ah campaign hi a ṭan a, Congress president Rahul Gandhi chu na takin a bei nghal. Chamarajanagar-ah hian BJP chief ministerial candidate BS Yeddyurappa'n a ṭawiawm a ni.

Modi hian chawhnu lamah tuipui kama Udupi khuaah thu a sawi leh a, heta aṭang hian hmarlam Belagavi district-a Chikkodi khua a pan leh nghal a ni.

Modi hian ni nga chhungin rally 15-ah thu a sawi dawn a, nimin bikah khan hmun thumah thu a sawi a ni. May 3, 4 leh 5 te hian hmun hrang hrangah thu a sawi leh ang. A campaign tawpni hian Gadag khuaa rally neihnaah thu a sawi dawn a, Prime Minister zinga kum 36 chhunga Gadag tlawh hmasa ber tur a ni ang.

Karnataka hi state lian zingah Punjab tih loha Congress sorkarna awmchhun a ni a, hei vang hian BJP chuan Congress sorkar paihthlak ngei tumin ṭan an la nasa hle. Bharatiya Janata Party (BJP) Karnataka wing chuan independent MLA Jignesh Mevani leh actor Prakash Raj-te lakah Prime Minister Narendra Modi leh party chief ministerial candidate BS Yeddyurappa chungchang mawi lo taka an sawi avangin complaint an thehlut.

Chief Electoral Officer hnena complaint an theh-luhah, BJP chuan Mevani chuan PM Modi chu sumdawng leh rukru tiin a sawi tih an tarlang. Jignesh Mevani hian April 29-a Bengaluru-ah thu a sawinaah Prime Minister zahawm tak hi thil zuartu leh rukru niin a sawi tih an lehkha thehluhah an tarlang. Hei bakah hian Mevani leh Raj-te chu PM Modi leh Yeddyuarappa te hming tihchhiat tuma kawng hrang hranga beiah an puh bawk.