J&K Deputy CM leh minister tharte lalut

Jammu and Kashmir Deputy Chief Minister thar Kavinder Gupta chu nimin khan rinawman thu tiamtira laluk a ni a, a rual hian minister atana ruat thar mi pasarih te pawh lakluh nghal an ni.

Chief Minister Mehbooba Mufti-i chuan Thawhṭanni khan a cabinet hi a siksawi a, hemi atan hian Pathianni khan deputy chief minister Nirmal Singh bakah, BJP minister pahnihte chuan banna an thehlut a ni.

Governor NN Vohra chuan nimin khan Jammu-a Convention Centre-ah minister tharte hi a lalut a ni. Minister atana lakluhte hi Gupta bakah, BJP member pali leh PDP member pahnih an ni. Deputy CM hlui Nirmal Singh chu Assembly Speaker atan dah a nih thung.

CM Mufti-i chuan a minister tharte chanpual tur a sem nghal a, Deputy CM Gupta chu Industries, Commerce and Transport chantir a ni. PDP minister Mohammad Khalil Band chu Agriculture Productoin chan tirin, BJP state unit hotu Sat Paul Sharma chuan Housing and Urban Development Food, Civil Supplies enkawl tir a ni a, PDP minister Sonwar Mohammad Ashraf Mir chuan Consumer Affairs a chang thung.

Minister of state for transport Sunil Kumar chu cabinet rank-ah hlankai niin, Power Development a chang a, Forest Ecology and Environment chu BJP MLA Rajiv Jasrotia chantir a ni a, Health and Medical Education chu Devender K.Manyal-a pek a ni bawk.