Facebook-a thil share vangin journalist thubuai siamsak

Chhattisgarh-a journalist pakhat chu Facebook-a a cartoon share chu judiciary leh sorkar tihhmingchhiat tumna lam hawi nia ngaih a nih vangin, sorkar laka hel tura midangte fuihpawrh tum thubuai siamsak a ni.

Superintendent of Police K L Dhurv chuan complaint an dawn behchhanin, Kanker district-a Kotwali police station-ah Indian Penal Code Section 124-A hnuaiah journalist Kamal Shukla lakah hian thubuai ziahluh a nih thu a sawi. Complaint thehluttu hi Rajasthan mi a nih thu a sawi bawk.

Shukla hi Kanker aṭanga chanchinbu tih-chhuah, 'Bhumkal Samachar' editor a ni.

Shukla chuan a Facebook-a cartoon a share hi judget BJ Loya thihdan rinhlelhawm tak nia sawi chungchanga Supreme Court thutlukna siam kaihhnawih thil a ni tih a sawi. Gujarat-a police ten dawt hmanga Sohbrabuddin Sheikh an bei nia sawi chungchang chhuitu, judge Loya thih dan hi chhui chiang turin Supreme Court-ah ngen a ni a, mahse court chuan April 19 khan he ngenna hi a hnawl a ni. Shukla chuan judge Loya chungchanga an ngaihdan hi rampumah mi hrang hrangin an tarlang a, a ni pawhin a tilang ve mai niin a sawi. A cartoon post-ah chuan thil huathlala lam emaw, hel tura infuihna lam emaw a awm lo tih a sawi.

A thil post hi a paih leh nghal niin a sawi bawk.