J Dey thah thubuaiah Chhota Rajan thiam loh chantir

Mumbai-a special CBI court chuan kum sarih liamtaa veteran crime journalist Jyotirmoy Dey thah thubuaiah Chhota Rajan leh midang pariatte chu thiam loh a chantir. Thubuai siamsak zinga mi, journalist hlui Jigna Vora leh midang pakhat chu thiam chantir an ni thung.

Special court-in thiam loh a chantir te hi Rajendra S Nikhalje alias Chhota Rajan, Rohit Thangappan Joseph alias Satish Kalya, Abhijeet Kasharam Shinde, Arun Janardhan Dake, Sachin Suresh Gaikwad, Anil Bhanudas Waghmode, Nilesh Narayan Shendge alias Bablu, Mangesh Damodar Agawane, Vinod Asrani (deceased) leh Deepak Sisodia te an ni.

Chhota Rajan hi journalist Dey kahhlum a nihna tur ruahmantu ber nia puh a ni a, Sisodia chuan ralthuamte a supply a, midangte chuan journalist hi an bei nia sawi a ni.

Midday Eveninger-a Editor (Investigation) Jyotirmoy Dey, kum 56 mi chu kum 2011, June 11 khan Mumbai-a Powai-a a chenna bulah kahhlum a ni. Dey thah a nih dan hian ramchhung media-te a nghawng na hle a ni.

He tualthahna thleng inhnamhnawiha puh leh sum thawhtu ber nia sawi, Vinod Asrani chu kum 2015 April thla khan a thi tawh a ni. Asrani hian gunmen ho hnenah Dey hi a hriattir nia sawi a ni. Chhota Rajan hi Indonesia-ah man a ni a, kum 2015 November thla khan India ramah hruai kir a ni a, Tihar jai-ah a tang mek.

Dey that tur hian contract killer-te cheng nuai nga-a chhawr an ni a, advance-in cheng nuai hnih pek lawk an ni a, that tura thupetu ber chu Chhota Rajan nia sawi a ni bawk. Veteran crime journalist Dey hian kum sawmhnih chuang zet chu Mumbai underworld gang chungchang chhuiin a ziak ṭhin a ni. Rajan hian Dey hi a hmelma, Dawood Ibrahim tana thawk nia ringhlelin a that tir nia rin a ni bawk.