Cauvery lui tui sem danah hun pek belh turin ngen

Sorkar laipui chuan nimin khan Supreme Court-ah ngenna thehlutin, Cauvery lui tui sem dan tur ruahmanna a siam turah hun pek belh turin a ngen.

SC hnenna ngenna thehluhah hian Cauvery lui tui sem dan chungchang ruahmanna siam hi zawhfel a ni ṭep tawh tih sawiin, a tihfelna tur hian hun tlem an la mamawh niin an sawi a ni. Hetih lai hian sawiseltu lam chuan sorkar hian May 12-a Karnataka assembly inthlan neih tur avangin Cauvery chungchanga thutlukna hi la siamfel ngam loin tihkhawtlai a tumna niin an sawi thung.

Court hian sorkar laipui hnenah May 3 hmaa Cauvery Management Scheme draft thehlut turin alo hriattir tawh a ni. Hemi hma hian sorkar laipui chuan thla thum chhunga Cauvery lui tui inchuh chungchang ngaihtuahtu tur, Cauvery Management Board din turin a lo ti tawh a, mahse hun pek chhung hian sorkar laipui chuan a din hman lo. Cauvery management board din hi Karnataka lamin an duh lo nia sawi a ni a, hun tiam chhunga din a nih loh vang hian Tamil Nadu-a rorellai leh eptute chuan nasa takin lungawi lohna an lo lantir tawh a ni. Hemi hnu hian sorkar laipui chuan scheme siam tur hian thla thum hun pe turin a ngen leh a ni.