Khawpui boruak bawlhlawh zingah India khawpui te an langsar

World Health Organization (WHO) chuan khawpui boruak bawlhlawh zual 20 a tarlang a, chung zinga a tam zawk chu India rama khawpui te an ni.

WHO-in a tarlan dan chuan khawvela ram hrang hrang khawpui boruak bawlhlawh zual 20 zinga, khawpui 14 chu India khawpui te an nih thu an tarlang. New Delhi, Gwalior, Varanasi leh Kanpur te chu khawpui boruak bawlhlawh zual zingah an tel. Heng bakah hian Faridabad, Gaya, Patna, Agra, Muzaffarpur, Srinagar, Gurgaon, Jaipur, Patiala leh Jodhpur te chu an lang bawk.

Prime Minister Narendra Modi-a bial Varanasi chu boruak bawlhhlawhna ber niin, industry, agriculture leh transport sector-te chu boruak tibawlhlawhtu langsar an ni. New Delhi chu mihring tana hrisel lohna khawp thlen thei boruak thianghlimlo tamna ber niin, a sang fal hle. Nikum November thla pawh khan Indian Medical Association chuan public health emergency a lo puang hial tawh a ni. Zirna in khar a ngai a, boruak bawlhlawh tihziaawm nan sum tam tak sen a ni bawk.

Zirchianna aṭanga a lan dan chuan India ramah hian kumtin mi mkataduai 1.1 chu boruak bawlhhlawh avangin an thi tih WHO report chuan a tarlang. WHO chuan khawvel mihring 10 zela pakua te chuan boruak bawlhlawh an hiplut tih sawiin, kum tin mi maktaduai sarih velin an thihpui ziah niin a tarlang.

India bakah hian Kuwait, China leh Mongolia te chu khawpui boruak bawhhlawh zingah an tel bawk. Asia ramte chu boruak bawlhhlawh avanga thi tamna an ni a, Eastern Mediterranean Region, Europe leh America te an lang bawk.