SC-in hri vanga thite chhungte sum pek tur pawm
Supreme Court chuan sorkar laipuiin Covid-19 vanga thi chhungte hnena zangnadawmna, Rs 50,000 pekna tura ruahmanna a siam chu nimin khan a pawm.
Zangnadawmna pek tur hian state sorkarin a hrana scheme a lo siam tawhte belhna tur a ni a ti a, document thehluh aṭanga ni 30 chhungin sum hi pe hman turin a ti bawk.
Justice MR Shah kaihhruai bench chuan hri kai thi, an death certificate-ah Covid-19 tih a inziah loh vang ringawtin sorkar chuan sum hi a pek loh phah tur a ni lo, a ti. Hri kai thi, death certificate-a Covid-19 tih inziaklote chu an chhungte chuan district committee-a official-te hnenah an thlen thei tih a sawi bawk. Hemi chungchang hi mipuite an hriatchian theihna turin District Disaster Management Authority address leh contact details chu media hrang hranga tihchhuah tur a ni a, kar khat chhung ngeia tichhuak turin bench chuan a hriattir bawk.
June 30 khan SC chuan National Disaster Management Authority (NDMA) hnenah hri vanga thi chhungte chhawmdawlna pek dan tur kaihhruaina hi duang turin a lo hrilh tawh a ni. NDMA-in hri vanga thi chhungte Rs 50,000 pek rawtna a siam thu hi sorkar laipui chuan SC hi a hriattir ve leh a ni.