India-ah kar khat chhunga hri kai zat 22% in tlahniam

Kerala state-a Covid-19 kai nasa taka an tlakhniam avangin India ramah kar khat chhunga hri kai hmuhchhuah pawh an tlahniam a, kar liam ta kha June thla laihawl hnua an tlakhniam ber ṭum leh thla sarih dawn hnua kar khat chhunga hri kai mek, active case nuai hnih hnuailama a tlak thlak vawi khatna a ni.

September 27-October 3 khan Covid kai thar nuai 1.56 hnuai lamah awmin, a kar hmasa leha nuai hnih chuang ai khan 22% in an tlahniam a ni. Kar 15 liamta, June 14-20 ai khan kar khat chhunga hri kai hi 29.5% in an tlahniam tawh bawk.

Kar liamta kha thla sarih dawn, March 8-14 inkar hnua hri kai thar an tlem ber ṭum niin, ramchhunga hri leng thawh hnihna thlen hnua kar khat chhunga hri kai thar nuai 1.56 hnuailama an awm ṭum khatna a ni.

Ramchhunga hri kai tlakhniamna chhan ber pakhat chu hri kai hmuhchhuah tamna ṭhin Kerala state-ah hri kai nasa taka an tlakhniam vang a ni. Kerala-ah hian kar liam ta khan Covid-19 kai thar 90,291 an awm a, a kar hmasa leh aiin 25.6% (nuai 1.21) in a tlahniam a ni. Kar 11 hnua ni sarih chhunga hri kai nuai khat aia tlem an hmuhchhuah ṭum khatna a ni bawk.

Kerala-ah hian kar thum chhung hri kai an tlakhniamna a ni tawh a, Onam hnuah hripui leng chuan ziaawm lam a pan mek zel a ni. Hetihlai hian Kerala chu ramchhung state zinga hri kai hmuhchhuah tamna ber a la ni tho a, kar hmasa khan rampum huapa hri kai thar aṭanga 58% chu an state chhunga hmuhchhuah niin, a kar hmasaa hmuhchhuah 61% nena khaihkhin chuan an tlahniam tawh thung. Hri lengin peak a thlen lai khan Kerala-ah hian ramchhunga hri kai zat aṭangin 70% dawn an awm hman a ni.

Mizoram-ah hri kai thar an pungchho zel a, test aṭanga hri kai zat erawh a tlahniam thung. India-ah kar liamta khan hri vang thi 1,860 an awm a, a kar hmasa leha thihpui aiin 7% in an tlahniam. March 15-21 inkar hnua kar khat chhunga hri vanga thi an tlem ber ṭum a ni.