India leh Sri Lanka-in Military Exercise nei ṭan

India leh Sri Lanka chuan nimin aṭang khan ni 12 awh tur 'Mitra Shakti' mega military exercise an nei ṭan a, Sri Lanka ramkhawchhak lam Ampara-a Combat Training School-ah firfiakte beihlet dan tur an zir dawn a ni.

'Mitra Shakti' vawi riatna, October 4-15 inkar chhunga neih turah hian Colonel Prakash Kumar hona hnuaiah Indian Army personnel 120-a arms contingent te chu an tel tih Sri Lanka Army chuan a sawi.

Joint military exercise hi ramri hrula firfiakte chetdan kawnghmang, transnational terrorism, inter-operability skills, ram pahnih chindan ṭha leh tawn hriat inzirtirna hun atan hman ṭhin a ni.

India sipaite hian Ampara-a Combat Training School chu kar liamta Inrinni khan Indian Air Force aircraft hmangin an lut tawh a ni.

Kumtina neih ṭhin training programme hi ram pahnih inkara sipaite thawhhona leh chakna thar petu, inhriatthiam tawnna leh ram ṭhenawm inkara inkungkaihna ṭha zawk neihna atana buatsaih niin, India-ah emaw Sri Lanka-ah emaw zawk zawk neih ṭhin a ni.

Ministry of defence chuan kar hmasa khan "exercise in a tumbul ber chu ram pahnih inkara sipaite inlaichhina ṭha zawk chawilar te leh firfiak leh hmelmate beihlet kawnga inzirtirna ṭha zawk neihnan a ni" tiin a sawi.

Indian Army arms contingent, sipai 120 te leh Sri Lanka Army-a battalion khat contingent te chu drill-ah hian an tel.