Rajasthan leh UP-a Vut thlipui tlehah mi 79 thi

Rajasthan leh Uttar Pradesh-ah Nilaini tlai khan vut thlipui a tleh a, thlipui tlehin chhiatna a thlenah mi 79 an thi a, in tam tak a lenchhiat bakah thingkung leh electric bante a tlu nasa hle.

Rajasthan-ah thlipui tleh vang hian mi 32 an thi a, Uttar Pradesh-ah mi 47 an thi. Agra district bikah thi zat hi mi 36 an tling a ni. Uttar Pradesh sorkar chuan darkar 48 chhung chu thlipui a thawk leh maithei nia sawiin mipuite fimkhur turin a chah.

Uttar Pradesh Principal Secretary (Information) Avanish chuan thlipui tuartu-te chhawmdawlna pe turin Agra division commissioner pawh hriattir nghal anih thu leh, hliam tuar damdawi-ina awmte pawh senior officer-ten an tlawh thu a sawi. Thlipui tleh tuartu district hrang hrang aṭangin report kimchang an nghak mek tih a sawi bawk.

Rajasthan Chief Minister Vasundhare Raje-i kaihhruai sorkar chuan thli tleh vanga thi chhungte chu cheng nuai li ṭheuh pek an nih tur thu a puang. Prime Minister Narendra Modi pawhin Rajasthan leh Uttar Pradesh-a thlipui tuartute a tawrhpui thu a twitter-ah a tarlang a, central official-te pawh chhawmdawl hna thawhna kawngah state sorkar thawhpui turin a hriattir thu a sawi.