National film awardee-te President chungah an lawm lo

President Ram Nath Kovind chuan vawiin hian 65th National Film Awards dawngtu mi 137 zinga mi 11 hnenah chauh chawimawina hi a hlan dawn a, hei vang hian award dawngtute hi an lawm lo hle.

National Film Award hi vawiin hian Delhi-a Vigyan Bhavan-ah sem a ni dawn a, President hian award semna hun hi hmanpui dawn mah se programme pum hi a telpui hman dawn lo a ni. Hei vang hian chawimawina semchhuah tur zinga 11 chauh President hian a pe hman dawn a ni.

Rashtrapati Bhavan thupuangtu, Ashok Malik chuan organizer-te hnenah pawh a hma daihin President hian function hi darkar khat chauh a hmanpui thei dawn a, award pawh tlemte chauh a sem hman dawn tih an hriattir lawk niin an sawi. Awardee-te nen thla erawh an la ho dawn niin a sawi a ni. Malik chuan President atana Ram Kovin Nath lakluh a nih aṭang khan Republic Day leh meeting pawimawh zual bik tih lohah chuan president hian function dang reng reng chu darkar khat chin pawh a telpui ngai lo tih a sawi a ni.

National Film Award hi kumtinin President hian a sem ṭhin a, award semna inkhawm hi minister for information and broadcasting in a telpui ziah ṭhin bawk.