Karnataka election : BJP in manifesto tlangzarh

Karnataka Assembly inthlan neih tur atan Bharatiya Janata Party (BJP) chuan nimin khan manifesto a tlangzarh a, an thil tih tum zingah hmeichhiate himna atana flying squad siam te, a thlawna smartphone semte a tel.

Manifesto hi BJP state unit president leh party chief ministerial candidate BS Yeddyurappa-an a tlangzarh a ni.

BJP chuan assemby inthlana sorkar siam tura an chak a nih chuan, state chhunga hmeichhiate himna tura nasa taka hma lak a tiam a, hemi atan hian "Kittur Rani Chennamma Flying Squads" an siam dawn niin a sawi. Hei bakah hian hmeichhe police officer kaihhruaina hnuaiha Special Investigation Cell siamin, hmeichhe laka pawikhawihna thleng thubuai thleng chungchang chhui tura hmeichhe police 1,000 rawih an tum thu a sawi.

BPL chhungkuaa hmeichhiate leh zirlai hmeichhiate chu sanitary napkin a thlawna sem vek a tiam a, hemiin a huam loh hmeichhe dangte pawhin 'Stree Suvidha Scheme' hnuaiah sanitary napkin hi Rs 1 chauhin an lei thei bawk ang. BPL chhungkuaa hmeichhiate hnenah a thlawna smartphone semna tur, "Mukhya Mantri Smartphone Yojane" pawh kalpui a ni dawn tih an puang bawk. Hei bakah hian BJP chhungkuaa hmeichhe pasal neite chu Rs 25,00 leh rangkachak gram thum pek an ni bawk ang.

Manifesto-ah hian hmeichhia self-help group-te hnenah loan, cheng nuai hnih thleng chu 1% chauha punga puktir an nih tur thu an tarlang bawk.

BS Yeddyurappa chuan loneitute hmakhua pawh an ngaihsak dawn tih sawiin, state chhunga irrigation project hrang hrang siamna turin cheng vaibelchhe 1,50,000 an dah tur thu a sawi.

Bawng humhalhna tur, 'Go Seva Ayog' pawh din thar ani dawn tih BJP chuan an sawi a, bawng talh khapna “Karnataka Prevention of Cow Slaughter and Preservation Bill 2012” pawh siam thar leh a tiam. Congress sorkarin mipuiten man tlawm zawka thil an lei theihna tur, 'Indira canteen' siamte chu chhunzawm a tihlen zel a tiam a, hemi rual hian an sorkar chuan 'Indira canteen' tih hi 'Annapurna canteen' tia an thlak tur thu an sawi.

BJP MP Shobha Karandlaje chuan manifesto an tlangzarh chuan hmathlir thui tak nei, state mipuite duhthusam leh beiseina tihhlawhtlinna tur a ni, a ti. He manifesto buatsaih nan hian mi nuai thum zel leh expert-te rawn an ni tih a sawi bawk.

Member 224 awmna Karnataka Assembly inthlan hi May 12 hian neih a ni dawn a, May 15-ah vote chhiarin inthlan result puan a ni ang.