District pathumah Rahul Gandhi campaign

Congress Party president Rahul Gandhi chu assembly inthlan neihna tur, Karnataka-a district pathum Kalburgi, Gadag leh Haveri-ah nimin khan an party tan a campaign.

Rahul Gandhi hian public meeting hrang hrangah thu a sawi bakah, party worker-te a kawm bawk. Prime Minister Narendra Modi leh a kaihhruai NDA sorkar chu na taka sawiselin, BJP sorkar hnuaiah ramchhunga hmeichhiate chunga pawikhawihna thleng a hluar hle niin a sawi. BJP MLA-te lak aṭang ngei pawhin hmeichhiate humhim an ngai a ni, a ti.

Gandhi chuan Dalit hnamten beih an tawk nasa a, hetianga pawikhawihna a thleng reng chung hian PM Modi chu ṭawngchhuak duh loin a ngawi reng a ni, tiin a sawi. Garden city tia sawi, Bengaluru chungchanga PM Modi-an bawlhhlawh awmkhawmna khawpui, 'garbage city' tia a sawi chu inhmuhsitna niin a sawi bawk.