UP Police-ten Priyanka Gandhi an man ; Congress-in dan kalha cheah Police-te an puh

Uttar Pradesh-a Lakhimpur Kheri district-a buaina chhuaka thi, loneitu chhungte hmuh tuma Congress general secretary, Priyanka Gandhi Vadra kal tum chu police-ten Thawhṭanni zing khan an man.

Pathiannia Lakhimpur-a loneitute nawrh huaihawt chu BJP worker-te khalh nia sawi motorin sut an ni a, buaina chhuak zuiin mi pariat an thi a ni. Mipui awmkhawmte sutu motor zingah hian union minister of state for home, Ajay Mishra motor, a fapa-in a khalh nia sawi pawh a tel.

Congress hruaitu Priyanka Gandhi Vadra hi buainachhuaka thi chhungte hmu tur hian a kal a, mahse Thawhṭanni zing khan police-te chuan lo manin Sitapur-a PAC guest house-ah an hreng zui a ni.

Priyanka man a nih dan hi Congress party lam chuan nasa takin an sawisel nghal a, police-te hian CrPC section 151 hnuaiah an man tia an sawi laiin, he dan hnuaiah hian judicial magistrate hnena hruai a nih hma chuan darkar 24 aia tam hren theih a ni lo a, mahse darkar 30 chuang an hreng a, hei hi dan kalh a ni tih union finance minister hlui P Chidambaram chuan a sawi. Hei bakah hian hmeichhia tupawh, tlai ni tlak hnu leh zing ni chhuak hmaa man theih a ni lo tih sawiin, Priyanka hi zing dark 4.30-ah man a ni a, hei pawh dan kalh a ni bawk tih an sawi. "Police officer mipain a man a, dan kalh bawk a ni. Man a nihna tur memorandum engmah a awm lo a, amah pawh hriattir ni loin a signature pawh lak a ni lo a, heng zawng zawng hi dan kalh vek a ni," a ti.

Congress party chuan an party hruaitu laka UP sorkar leh police-te chet dan chu ram danpui kalh a ni tiin, an dem thu an sawi.