India rama puitling 70% te vaccine dose khatna pek an ni tawh

Union Health Minister Mansukh Mandaviya chuan Thawhṭanni thleng khan India rama puitling Covid-19 vaccine la thei chin zinga 70% te chuan dose khatna an la tawh tih a sawi.

"Ram chak, vaccine semchhuak rang, India-ah chuan Covid19 vaccine dose khatna chu ramchhunga mipui 70% hnenah pekchhuah a ni ta. PM Narendra Modi kaihhruina hnuaiah India chuan hripui leng kan dona kawngah mellung kan phun thar leh ta," tiin minister chuan a twitter kaltlangin a sawi.

Thawhṭannia vaccine dose 23,46,176 semchhuah nen, ram pumah Covid-19 vaccine dose vaibelchhe 90.79 chuang semchhuah a ni tawh. Heng vaccine-te hi session 88,05,668 kaltangin semchhuah an ni.

Official tarlan danin ramchhunga vaccine la thei puitling zinga 25% velin dose bi kimin an la tawh a, state leh UT tana semchhuah mai theih turin vaccine hi dose vaibelchhe 5.67 chuang a awm bawk.

Sorkar laipui data aṭanga a landanin, chawhrualin May thla chhung khan nikhata vaccine semchhuah hi dose nuai 19.69 a ni a, June-ah nuai 39.89 a kai chho a, July-ah nuai 43.41 niin August-ah nuai 59.19 a kai chho. September thla khan chawhrualin nitin dose nuai 79.08 semchhuah a ni.