Haridwar-a Kristian ṭawngṭai inkhawmna hmun beih a ni

Uttarakhand-a Haridwar disrtict-a Roorkee khuaa Kristiante ṭawngṭai inkhawmna hmun chu Pathianni khan mi 500 velin beiin, he hmuna lo awmte chu kut an thlak bawk.

Kristiante ṭawngṭaina hmun beitute hian awmkhawmte kut an thlak lai hian “Jai Shri Ram” leh “Vande Mataram” titein an au a ni.

Solanipuram Colony-a pawikawihna thlen hun hi Pathianni zing lam dar 10 vel a ni a, Kristian missionary-te chu sakhaw thila inkhawmna buatsaih leh midangte rawngbawlna hmanga Hindu-te Kristian sakhuaa inleh tir ṭhinah an puh a ni.

Roorkee Circle Officer Vivek Kumar chuan he thil thleng hi police-ten an chhui nghal thu leh mi 200 lakah thubuai ziahluh a nih thu a sawi. Inspector hoin thil thlen dan chiang zawka chhui a ni dawn tih a sawi bawk.

Congress national social media convenor Saral Patel chuan prayer room chhunga ṭhutthleng suasam thlalakte chu a twitter-ah tarlangin, he pawikawihna thlen lai hian chief minister Pushkar Singh Dhami chu Haridwar district-ah hian a awm a, he thil hi sorkar thupek anga tih a ni zawk em tihte a zawt a ni.

Congress MP Shashi Tharoor chuan Sangh Parivar-te chuan hetianga chetna atthlak leh rawng tak hi an dem thu an sawi dawn em tih zawtin, Kerala lamah chuan Sang Parivar chu Kristian bishop-te rilru hneh tuma an khawsak zawk thu a sawi. Kreala-a Syro-Malabar Catholic Church-a Palai diocese bishop Joseph Kallarangatt-a'n September 8-a “jihadis” ten Muslim ni lote tihchhiat tumin ruihhlo hrang hrang an hmang nia a sawi chuan inhnialna a chawk chhuak nasa hle. BJP chuan Kallarangatt thusawi hi an thlawp tih sawiin, hetianga thiltitute hremna tur dan siamte pawh an phut thu an sawi.

Uttarakhand Congress state vice-president Dhirendra Pratap chuan ualau taka Kristiante beih leh bitum an ni chu an dem thu sawiin, rorellai BJP chuan nakkuma assembly inthlan an neih dawn karah sakhaw hrang hrang inkarah inhuatna a chawk chhuak mek a ni, a ti.

Hetih lai hian BJP state president Madan Kaushik chuan prayer house-a pungkhawmte thiltih dan chu a rinhlelhawm niin a sawi thung a, an state-ah chuan sakhua inlehtir chu phal a ni lo tih a sawi.