Shopian-a inbeihnaah hel panga kaphlum

Jammu and Kashmir-a Shopian district-ah nimin khan security force leh helho an inkap a, hel panga an thi niin police-ten an sawi. Security force pahnihin hliam an tuar bawk.

Press Trust of India-in a report danin, sipaiten hel an kahhlum zingah hian Hizbul Mujahideen commander Saddam Padder pawh a tel. Hel kahhlum dangte hi tute nge an nih tih leh, eng pawl nge an ni tih hriatchian tum mek a nih thu official-te chuan an sawi.

Central Reserve Police Force (CRPF), Jammu and Kashmir Police leh Rashtriya Rifles-te chuan hel an awm tih thu an dawn avangin Kashmir chhim lam, Shopian district-a Zainapora biala Badigam khuaah beihpui an thlak a, hel birute hian security force-te hi lo beiin an inkap zui a ni. Hel thi zingah hian kar kalta Zirtawpni aṭanga chin hriat loha bibo, Kashmir University assistant professor Mohammad Rafi Bhat pawh a tel nia hriat a ni. University-a Sociology department-a contractual assistant professor Bhat hian Zirtawpni khan helho hi a zawm a, Badigam-a security force-ten hel an hualbeh zingah hian a tel a ni. Bhat a tel ve tih an hriat hian inpe turin ngen a, a rilru hnehsak tum hian a chhungte pawh hruai an ni tih Inspector General of Police (IGP), Kashmir, S P Pani chuan a sawi a, mahse a inpe duh lo a ni.

Security force-ten helho laka beihpui an thlak hi tualchhung mite chuan lo dan tumin lungin an lo tawng a, mahse CRFP tirh belh nghal a ni. Inbeihna thleng vang hian nimin zing aṭang khan Shopian district-a hian internet service tihtawp nghal a ni. Thuneitute chuan social media lama thu dik lo thehdarh tur venna atan cellular company-te chu 3G, 4G leh 2G mobile internet service-te Srinagar khawpuiah titawp turin an ngen bawk.