Jharkhand-ah hmeichhia pawngsual rawn hnuah hal hlum

Jharkhand state-ah hmeichhe tleirawl kum 16 mi chu kar kalta Zirtawpni khan pawngsual rawna a nih hnuah hal hlum a ni. Pawikhawihtua puh mi 14-te chu police-ten an man nghal.

Police-te chuan he pawikhawihna thlenna hmun hi Naxal hel hluarna, Chatra district-a Raja Tenduah khua a ni tih an sawi a, pawikhawihnaa inhnamhnawiha puh mi paruk chu an bibo hman avangin zawn mek an ni tih an sawi bawk. He pawikhawihna rapthlak tak chhui tur hian Special Investigation Team din nghal a ni tih an sawi bawk.

Hmeichhe chhungte hian Ningani zan khan zu rui mi pali chuan an fanu hi hruaiboin an pawngsual niin an sawi. He thil thleng hi hmeichhe pa hian an khaw hotu leh Panchyayat member-te hnenah a thlen nghal a, pawikhawihtute hi beng pawta vawi 10 suk tirin, Rs 50,000 an chawi tir a ni. Hetianga hrem an nih vanga thinrimin pawikhawihtute chuan hmeichhe tleirawl te hi an luhkhung a, a chhungte chu kut thlakin amah hi an hal hlum ta a ni. Hmeichhe chhungte hian Itkhori police station-ah thubuai an thehlut nghal a ni.