Srinagar-ah nawrh huaihawt

Jammu and Kashmir-a Shopian district-ah security force leh helho inkahnaah Pathianni khan Hizbul Mujahindeen mi panga bakah civil mi panga an thi a, he thil thleng duh lohna lantirin nimin khan inlakhran duhtu pawl chuan Srinagar leh Kashmir Valley hmun ṭhenkhatah nawrh an huaihawt.

Srinagar-ah chuan Civil Secretary bulah nawrh hi huaihawt a ni. Nawrh huaihawttu hi Syed Ali Geelani, Mirwaiz Umer Farooq leh Muhammad Yasin Malik-te kaihhruai Joint Resitance Leadership (JRL) an ni. Geelani leh Mirwaiz te chu pawn chhuak thei loin house arrest-a hren mek an ni a, Malik hi chu police-ten an la hreng a ni.

Nawrh huaihawt dawn vang hian Kashmir Valley a zirna in te khar vek an ni a, nimina exam nei turte pawh exam hun sawnhlat sak an ni. Venthawn thilah rel service pawh tihtawp lailawk a ni bawk. Pathianni aṭang khan Kashmri chhim lam district leh Srinagar-ah mobile internet service tihtawp a ni bawk.