Rahul leh Priyanka Gandhi-te Loneitute thihna hmun tlawh phalsak

Uttar Pradesh sorkar chuan Congress party hruaitu, Rahul Gandhi leh Priyanka Gandhi Vadra-te chu Pathiannia loneitu nawrh huaihawtte motor-in chil a, mi pariat an thih phahna hmun Lakhimpur Kheri chu tlawh phalsak an nih thu nimin tlai khan a sawi.

UP additional chief secretary Awanish Kumar Awasthi chuan Lakhimpur Kheri hi ṭum khatah mi panga chin zelin an tlawh phalsak a ni tih sawiin, Rahul Gandhi-te unau bakah midang pathum an tel ve thei dawn a ni. Anni bakah hian Thawhṭannia Lakhimpur Kheri aṭanga km 15 vela hlaa an lo dan, Aam Aadmi Party MLA Raghav Chadha hoa AAP palai kalte pawh an kal phalsak an ni bawk ang.

Pathiannia buaina chhuak vanga mi pariat thi zinga pali hi loneitu an ni a, mitthi chhungte tlawh tura Priyanka Gandhi Vadra kal tum chu Thawhṭanni zing khan Uttar Pradesh police-te chuan lo dangin an hreng zui a ni. Thawhlehni khan Rahul Gandhi leh Congress hruaitu dangten tlawh an tum chu UP sorkar chuan phalna a lo pe duh tawh lo bawk a ni. Mahse nimin tlai khan sorkar chuan party hruaituten Lakhimpur Kheri an tlawh hi a remtihsak ta a ni.

Nimin khan Rahul Gandhi hian UP hi a pan nghal a, party hruaitu hlun Bhupesh Baghel, Charanjit Channi, KC Venugopal leh Randeep Surjewal-ten an ṭawiawm. A farnu Priyanka Gandhi pawh Sitapur 2nd PAC battalion aṭangin chhuah a ni tawh bawk a, nimin tlai khan a unau bakah party hruaitu dang pathumte nen Lakhimpur Kheri hi an pan nghal a ni. Priyanka Gandhi chuan Sitapuar-a PAC compound-a hren a nih dan chu dan kalh a ni tiin, a lakah FIR thehluh emaw, notice pek emaw pawh a awm lo tih a sawi.

Union minister of state for home affairs, Ajay Mishra chuan nimin khan union home minister Amit Shah chu Delhi-ah a hmu. Hei hi Lakhimpur Kheri-a buaina a thlen hnuah Amit Shah a hmuhna hmasa ber a ni. Lakhimkhur Kheri-a loneitu nawrh huaihawtte chiltu motor zingah khan Union Minister Mishra motor, a fapa Ashish Mihsra Teni-a khalh pawh a tel nia sawi a ni. He thil thleng vang hian eptu party-te chuan Mishra hi union minister a nihna aṭangin bang turin an phut na hle a ni.

Lakhimpur Kheri leh Sitapur-ah political party hruaitute an kal dawn vang hian boruak ṭha lo a chhuah venthawn thilah nimin khan internet service tihtawp vek a ni. Hemi chungchang hi sorkar lam aṭangin thuchhuah siam lo mah se, official-te chuan fimkhur thila an tih a nih thu a sawi a, boruak ṭha lo a thleng lo a nih chuan hlih leh nghal a ni dawn tih an sawi.