Delhi leh NCR-ah vut thlipui tleh

Delhi leh National Capital Region-ah Thawhṭanni zan khan vut thlipui, dust storm a tleh a, thuneitute chuan hmarlam state-te chu fimkhur turin a chah zui nghal.

Met department chuan ruah leh thli na tak thawk tur vangin warning a lo tichhuak tawh a, Delhi sorkar leh Delhi traffic police-te pawhin hriattirna an tichhuak ve leh a ni. Mipuite chu fimkhur tur leh, pawn chhuak lo turin an chah.

Thlipui leh ruah thawk vang hian Haryana-ah chuan Thawhṭanni leh Thawhlehni chu school chawlh puan a ni a, Delhi-ah pawh tlai lam school-te chu khar an ni bawk. Vut thli tleh hian Rajasthan hmun hrang hrang a lo nuai tawh a, UP khawthlang lam pawh thli tleh leh ruahin a nuai bawk. Meerut leh Ghaziabad-ah nimin khan school khar vek a ni.